गण्डकीको मुख्यमन्त्रीमा कांग्रेसका कृष्णचन्द्र नेपालीको दाबी पेस [३१ सांसदको हस्ताक्षरसहित]

पोखरा– नेपाली कांग्रेस संसदीय दलका नेता कृष्णचन्द्र नेपालीले गण्डकी प्रदेशको नयाँ मुख्यमन्त्रीको दाबी पेस गरेका छन्। प्रदेश प्रमुख सीताकुमारी पौडेल समक्ष मुख्यमन्त्रीको रुपमा विश्वासको मत लिन आवश्यक पर्ने ३१ सांसदको हस्ताक्षर र सांसद सहित नेपालीले दाबी पेस गरेका हुन्। 

उनको दाबीमा नेपाली कांग्रेसका १५, नेकपा माओवादी केन्द्रका ११, राष्ट्रिय जनमोर्चाका २, जनता समाजवादी पार्टीका २ र स्वतन्त्र १ सांसदको हस्ताक्षर छ। नेपाली सबै हस्ताक्षरकर्तासहित प्रदेश प्रमुख निवासमा साँझ साढे ५ बजे पुगेका थिए। 

यसअघि प्रदेश प्रमुख पौडेलले संविधानको धारत १६८ (५) बमोजिम बहुमत प्राप्त सांसदलाई नयाँ सरकार बनाउन २४ घण्टे समयसीमा दिएकी थिइन्। मुख्यमन्त्री पृथ्वी सुब्बा गुरुङले प्रदेशसभाबाट विश्वास गुमाएपछि उनले नयाँ सरकारको आह्वान गरेकी हुन्।