विराटनगरमा छठ : खोला–नहर खाली, टुट्यो मेयरको १७ वर्षे दण्डप्रणाम

विराटनगर– विराटनगर महानगरपालिकाका प्रमुख भीम पराजुलीले छठको पूजा गर्न थालेको १७ वर्ष भयो। हरेक वर्ष घरबाट घाटसम्म दण्डप्रणाम गर्ने उनले यस वर्ष घरबाटै छठको पूजा गर्ने तयारी गरेका छन्।

१७ वर्षदेखि निरन्तर दण्डप्रणाम गर्दै घाटमा पुग्ने गरेका उनले यस वर्ष घरबाट छठ पूजा गर्ने भएपछि घाट जाने कार्यक्रम स्थगित गरिएको बताए। कोरोना संक्रमणका कारण घरबाट पूजा गर्ने प्रमुख पराजुलीले बताए। उनले नगरबवासीलाई पनि घरबाटै पूजा गर्न आग्रह पनि गरे। 

विराटनगर–५ की राधा मण्डलले छठको पूजा गर्न थालेको वर्षौं भयो। हरेक वर्ष उल्लासका साथ छठ मनाउने गरेकी मण्डलले यस वर्ष घरको छतमा पूजाको तयारी गरिरहेकी छिन्। मण्डलले ७ वर्षदेखि निरन्तर ब्रत बस्दै आएको बताइन्।

नहरमा गएर पूजा गर्ने अवस्था नभएपछि छतमा पानी जमाएर अर्घ्य दिने उनले सुनाइन्। प्रशासनले नहरमा पूजाका लागि प्रतिबन्ध लगाए पनि बजारमा भीड भने घट्न नसकेको मण्डलको गुनासो छ।

विराटनगर–४ का पप्पु राउतले छठ पूजा गर्न थालेको १२ वर्ष भयो। मजदुरी गर्दै आएका उनी मनोकांक्षा पूरा हुँदै गएपछि छठको व्रतलाई निरन्तरता दिएको बताउँछन्। हरेक वर्ष श्रीमति पुनमसँगै नहरमा पूजा गर्दै आएका उनले यसपालि भने आँगनमा छठको तयारी गरेका छन्।

राउत भन्छन्, ‘कोरोना संक्रमणका कारण प्रशासनले नहरमा पानी छाड्न निषेध गरेपछि घरमै पूजाको तयारी सुरु गरेँ।’ नहरमा पूजा गर्न नपाउँदा उल्लास भने नहुने उनले बताए। पूजाको निरन्तरताका लागि मात्र व्रत बसिएको राउतले बताए। 

खोला–नहर सजिएनन्

वर्षमा एक पटक विराटनगरका खोला, नहरहरु सफा हुने गर्थे। छठका लागि नहर, खोला बेहुलीझैं सजिने गरेका थिए। भिडभाड नगरी पूजा मनाउनका लागि प्रशासनले निर्देशन दिएपछि घरबाटै पूजा थालिएको छ। छठका दिन सजिने गरेका स्थानहरु अहिले सुनसान बनेका छन्।

विराटनगरका संघिया खोला, केशलिया खोला र मोरङ–सुनसरी सिँचाइ आयोजना अन्तर्गतको नहर क्षेत्र पनि सुनसान देखिएको छ। तिहार लगत्तैदेखि जलाशयहरुमा घाट बनाउने गरेका स्थानीयले यसवर्ष घरमै छठ मनाउने निधो गरेपछि जलाशयको रौनकता गुमेको छ।

घरमै छठपर्व मनाउन नसक्नेहरुका लागि सुरक्षा मापदण्ड अपनाएर सम्बन्धित जलाशयमा गएर अर्घ्य दिन पाउने व्यवस्था गरिएको मोरङका प्रहरी उपरीक्षक सन्तोष खड्काले बताए। 

बजारमा पनि छैन चहलपहल

छठका लागि आवश्यक सामग्री खरिदका लागि विगतका वर्षहरुमा उल्लेख्य भीड हुने गरेको थियो। छठ सुरु भइसक्दा पनि पूजाका लागि आवश्स्यक सामग्रीहरु खासै बिक्री हुन नसकेको व्यापारीहरु बताउँछन्। सामान किन्ने ग्राहक नआउँदा व्यापारी फुर्सदिला बनेका छन्।

छठमा गत वर्ष करिब २ लाखको नरिवल बिक्री गरेका विराटनगरका व्यापारी पप्पु भगतले विहिबार साँझसम्म ५० हजारको पनि नरिवल बिक्री नभएको बताए। छठका लागि भनेर १ लाख ५० हजारको नरिवल खरिद गरेको उनले सुनाए। भगतले भने, ‘तिहारमा पनि फूल बिक्री नहुँदा नष्ट भयो।’