एप तथा सामाजिक सञ्जालको नियमन गर्न सरकारलाई संसदीय समितिको निर्देशन

काठमाडौं- प्रतिनिधिसभाको विकास तथा प्रविधिा समितिले नेपालभित्र प्रयोग हुने एप तथा सामाजिक सञ्जालहरुको नियमन गर्न सरकारलाई निर्देशन दिएको छ।

समितिको शुक्रबार बसेको बैठकले नेपालमा प्रयोग हुने कुनै पनि एप तथा सामाजिक सञ्जलाहरुको सुरक्षा गोपनियता र उपयोगिताका हिसाबले उपयुक्त रहेको पुष्टि गरेपछि मात्रै डाउनलोड गर्न पाइने व्यवस्था गर्न सरकारको सञ्चार तथा सूचना प्रविधि मन्त्रालयलाई निर्देशन दिएको हो।

साइबर अपराध र सुरक्षाबारे सञ्चार तथा सूचना प्रविधि मन्त्रालय, प्रहरीको साइबर ब्युरो, राष्ट्रिय सूचना प्रविधि केन्द्रलगायत सरोकारवाला निकायका पदाधिकारीसँग छलफल गरी नेपालमा विभिन्न एपहरुको अनधिकृत प्रयोग भएको निष्कर्ष निकाल्दै सरकारलाई प्रविधिसँग जोडिएका विभिन्न विषयमा निर्देशन जारी गरेको हो।

त्यस्तै समितिले सरकारी वेबसाइट र सूचना प्रविधि सेवा प्रदायक कम्पनीहरुको अनिवार्य सेक्युरिटी अडिट गर्ने व्यवस्था मिलाउन तथा सरकारी डोमेन नेम निजी क्षेत्रबाट दर्ता हुँदै आएकोमा यस्तो कार्य सरकारी निकायबाट गर्ने व्यवस्थाका लागि पनि निर्देशन दिएको छ।

समितिले सरकारी पत्र, कागजात, सूचना एवम् जवानकारीहरु अनधिकृतरुपमा दुरुपयोग हुने गरेको भन्दै यस्ता विषयहरु सरकारी आधिकारिक इमेल र वेबसाइटमात्र प्रयोग हुने गरी व्यवस्था मिलाउन समेत निर्देशन दिएको छ।

साथै सबै स्थानीय तहका वडा कार्यालय, स्वास्थ्य संस्था तथा माध्यामिक तहका सामुदायिक विद्यालयहरुमा द्रुत गतिको इन्टरनेट सेवा उपलब्ध गराउने कार्यक्रम प्रभावकारी रुपमा कार्यान्वयन गर्नसमेत निर्देशन दिएको छ।