सल्यानमा ६४ जना जनप्रतिनिधिले रोजे समाजवादी

सुर्खेत– नेकपा (एकीकृत समाजवादी) पार्टीका नेता एवम् कर्णाली प्रदेशका पूर्व आर्थिक मामिला तथा योजना मन्त्री प्रकाश ज्वालाको गृह जिल्ला सल्यानमा ६४ जना जनप्रतिनिधिले नयाँ पार्टी रोजेका छन्। एक–एकजना अध्यक्ष, उपाध्यक्ष, १६ जना वडाध्यक्ष र ६६ जना वडा सदस्यले नेकपा एकीकृत समाजवादी पार्टी रोजेका हुन्। 

सबै जनप्रतिनिधिले शुक्रबार निर्वाचन कार्यालय सल्यानमा पुगेर नेकपा एकीकृत समाजवादी पार्टीमा सनाखत गरेको सल्यानका पार्टी सचिव रमेश गौतमले जानकारी दिए ।

सल्यानका दश स्थानीय तहमध्ये कपुरकोट गाउँपालिकाबाट उपाध्यक्ष तीला बुढासहित दुईजना वडाध्यक्ष, चार जना वडा सदस्यसहित सातजना, त्रिवेणी गाउँपालिकाबाट एक वडाध्यक्षसहित ६ जना, छत्रेश्वरी गाउँपालिकाबाट एक वडाध्यक्षसहित पाँच जना, शारदा नगरपालिकाबाट तीन वडाध्यक्षसहित १६ जनाले समाजवादी रोजेका छन्। 

सिद्धकुमाख गाउँपालिकाका अध्यक्ष चित्रबहादुर चलाउनेसहित तीन जना वडाध्यक्ष ११ जना, बागचौर नगरपालिकामा तीन जना वडाध्यक्ष, दार्मा गाउँपालिकाबाट एक वडाध्यक्ष, कुमाख गाउँपालिकाबाट एक वडाध्यक्षसहित चार जना, बनगाड कुपिन्डे नगरपालिकाबाट तीन वडाध्यक्षसहित आठजना र कालीमाटी गाउँपालिकाबाट तीन जना सदस्यलेहरुले नेकपा एकीकृत समाजवादी पार्टी रोजेका हुन्।

स्थानीय तहको निर्वाचनमा सल्यानमा एमालेले चार स्थानीय तहमा प्रमुख, तीन स्थानीय तहमा उपप्रमुखसहित २७ वडाध्यक्ष, २८ दलित सदस्य, २४ महिला सदस्य र ५८ वडा सदस्यसहित कुल एकसय ४२ जना जनप्रनिधिले निर्वाचित भएका थिए। कुल जनप्रतिनिधिमध्ये ६४ जनाले नेकपा एकीकृत समाजवादी रोज्दा अब एमालेका जनप्रतिनिधिको संख्या ७८ मा झरेको छ ।