मन्त्रीमाथि बलात्कार आरोपको घटना : पीडित भनिएकी महिला भन्छिन्- मेरो इज्जतमा राजनीति घुसाइयो

सुर्खेत- कर्णाली प्रदेशका भूमि, व्यवस्था, कृषि तथा सहकारी मन्त्री कुर्मराज शाहीमाथि लागेको बलात्कार आरोपको घटना पीडित भनिएकी महिलाले आफू बलात्कृत नभएको बताएकी छन्। सोमबार सुर्खेतमा पत्रकार सम्मेलन गरी आफ्नो चरित्रहत्या गरिएको बताएकी हुन्। 

‘म बलात्कृत भएकै छैन, मलाई अन्याए भएको पनि छैन,’ पीडित भनिएकी ती महिलाले भनिन्, ‘म शिक्षित महिला हो। अन्याय भएको भए अदालत जान्थेँ, न्यायालयको ढोका ढक्ढक्याउन सक्थेँ।’

बरु राजनीतिक पूर्वाग्रहका कारण अनेरास्ववियू र युवासंघले मन्त्रीको राजीनामा मागेको ती महिलाको भनाइ छ। आइतबार नेकपा एमालेको भातृसंस्था युवा संघ र अनेरास्ववियूले बलात्कार आरोपित मन्त्रीको राजीनामा माग गर्दै विरोध र्‍याली, मुख्यमन्त्री कार्यालय घेराउ र मुख्यमन्त्रीलाई ज्ञापनपत्र समेत बुझाएका थिए।

‘हिजो अनेरास्ववियू र युवा संघले आन्दोलन गरे रे। केका लागि आन्दोलन गरे?’ उनले प्रश्न गरिन्, ‘मलाई एक पटक पनि फोन नगरेर मेरो इज्जतमा राजनीति घुसाइरहेका छन्।’ बरु सामाजिक सञ्जाल प्रयोगकर्ता र केही सञ्चारकर्मीहरुले आफूलाई जबरजस्ती बलात्कृत गराउन खोजेको आरोप लगाइन्।

'राजनीतिक फाइदाका लागि केही व्यक्तिले चरित्रहत्या गरिरहेका छन्,' उनले भनिन्। चरित्रहत्या गर्ने उद्देश्यले बलात्कार आरोपको घटनालाई अतिरञ्जित गरिएकाले आफूलाई बाँच्ने वातावरण बनाई दिन आग्रह गरिन्। यसअघि सार्वजनिक गरिएको भनिएको भिडियो फेक भएको उनको भनाइ छ। 

पीडित भनिएकी महिलाका श्रीमानले समेत बलात्कारको आरोपमा सत्यता नभएको बताए। ‘उसको (श्रीमती) र मन्त्रीको सम्बन्ध बाउछोरीको जस्तो हो,’ उनले भने, ‘बलात्कार जस्तो घटना हुनै सक्दैन।’ 

राजनीतिक पूर्वाग्रहका कारण आफूहरुको अनुमति नै नलिई हुँदै नभएको घटनालाई अतिरञ्जित गरिएको उनको भनाइ छ। मन्त्री/सांसद हुँदा सम्बन्धमा दरार आउँदा फरक राजनीति पार्टीका व्यक्तिले त्यसलाई गलत ढंगल प्रयोग गरेको उनको तर्क छ।