तीजमा खोलियो पशुपतिनाथ मन्दिरको पूर्वी ढोका 

काठमाडौं- पशुपतिनाथ क्षेत्र विकास कोषले लामो समयदेखि बन्द गरिएको पशुपतिनाथ मन्दिरको पूर्वी ढोका सर्वसाधारणका लागि खुला गरेको छ ।

तीजका व्रतालुलाई मन्दिर दर्शन सहज बनाउन तीजको अवसरमा ढोका खोलिएको कोषले जनाएको छ । २०६५ सालदेखि सर्वसाधारणका लागि पूर्वीढोका बन्द गरिएको थियो । त्यसयता मन्दिरमा जल ल्याउन मात्र ढोका खोलिने गरेको थियो । 

पूर्वी ढोका खोलिएसँग तीजका व्रतालुलाई मन्दिर दर्शन गर्न सहज भएको छ । व्रतालुले लाइन बसेको बढीमा दुई घन्टाम दर्शन गर्न पाउने कोषले जनाएको छ ।  

तीजमा छिटो र सहजरुपमा पशुपतिनाथ मन्दिरको दर्शन गराउनका लागि आजबाट पूर्वी ढोका खोलिएको हो । 

तीज, बालाचतुर्दशी, महाशिवरात्रि, साउने सोमबार जस्ता बढी भीड हुने पर्वमा धेरै समयसम्म लाइनमा बस्नु परेको गुनासो भक्तजनबाट आउन थालेपछि कोषले पूर्वी ढोका पनि खुला गरेको हो ।