हातमा ओपीडी टिकटसहित कोसी अस्पतालको शौचालयमा एक पुरुष मृत भेटिए

विराटनगर– कोशी अस्पताल विराटनगरको शौचालयमा एक पुरुष मृत फेला परेका छन्।

अस्पतालको ओपीडी भवनमा रहेको शौचालयमा मंगलबार दिउँसो साढे १ बजेतिर पुरुषको शव भेटिएको हो। मृतकको हातमा इनरुवास्थित सुनसरी जिल्ला अस्पताल ओपीडीको पूर्जा भेटिएको प्रहरीले जनाएको छ।

पूर्जामा लेखिएअनुसार मृत भेटिएका पुरुष सुनसरीको इनरुवा नगरपालिका–६ का ६१ वर्षीय होमराज पोखरेल हुन्। मोरङ प्रहरीका प्रवक्ता डीएसपी दीपक श्रेष्ठले मृतक सुनसरीबाट थप उपचारका लागि कोसी अस्पताल आएको हुनसक्ने बताए। मृतकको साथमा मधुमेह लगायतका रोगका औषधि पनि फेला परेको छ। घोप्टो परेर लडिरहेको अवस्थामा पुरुषलाई फेला पारिएको डीएसपी श्रेष्ठले बताए। 

मृतकका कोही पनि आफन्त सम्पर्कमा नआएको प्रहरीले बताएको छ। शव अस्पतालकै पोस्टमार्टम गृहमा राखिएको छ।