भारतीय अपहरणकारीको पन्जाबाट यसरी मुक्त भए दुई युवक

काठमाडौं– अपहरणमा परेका दुई युवकलाई भारतबाट प्रहरीले उद्धार गरेको छ। जिल्ला प्रहरी कार्यालय मकवानपुरको टोलीले अपहरणको तीन दिनपछि उनीहरूलाई भारतको बिहार राज्यको मोतीहारीबाट सकुशल उद्धार गरिएको हो।

उद्धार गरिनेमा हेटौंडा उपमहानगरपालिका–९ स्वागत टोलका २३ वर्षीय गोविन्द श्रेष्ठ र २२ वर्षीय पवन राना मगर छन्। दुवै जनालाई सकुशल उद्धार गरी परिवारको जिम्मा लगाइएको मकवानपुरका प्रहरी नायब उपरीक्षक जयश्वर रिमालले बताए।

उनीहरुलाई भदौ ३ गते राति साढे ९ बजे हेटौंडा बसपार्कबाट तीन जना भारतीय नागरिकले अपहरण गरेका थिए। अपहरण गरेर भारत लगेको खुलेपछि नेपाल प्रहरीले भारतीय प्रहरीको सहयोग लिएको थियो। ‘भारतीय प्रहरीको सहयोगमा खोजी गर्दा उनीहरूलाइ मोतीहारी लगेको भेटियो’, रिमालले भने। अपहरणमा संलग्न भारतीयका साथबाट हतियार पनि बरामद गरिएको प्रहरीले जनाएको छ। 

अपहरणमुक्त भएका दुवै युवक लागूऔषध प्रयोगकर्ता भएको प्रहरी अनुसन्धानबाट खुलेको छ। अनुसन्धानमा संलग्न अधिकारीहरूले लागूऔषध कारोबारका विषयमा कुरा नमिल्दा भारतीयले अपहरण गरेको हुन सक्ने शंका गरेका छन्। यद्यपि यसबारे अनुसन्धान जारी रहेको रिमालले बताए। उनका अनुसार अपहरण भएको दिन उनीहरु सँगै बसेर कुराकानी भएको पाइएको छ। 

 अपहरणकारीले उनीहरुसँग प्रतिव्यक्ति पाँच लाख भारतीय रुपैयाँ फिरौती माग गरेका थिए। फिरौती नपाए मिर्गौला बेचिदिने भन्दै यातनासमेत दिने गरेको पाइएको प्रहरीले जनाएको छ।