चक्रे मिलनका ‘बडीगार्ड’ पक्राउ

काठमाडौं- गुन्डा नाइके चक्रे मिलन (मिलन गुरुङ)को सहयोगीलाई प्रहरीले पक्राउ गरेको छ। नेपालगन्ज स्थित एक होटेलमा हतियार प्रदर्शन गरेको आरोपमा गणेश बहादुर बोगटीलाई प्रहरीले पक्राउ गरेको हो।

सामाजिक सञ्जाल (टिकटक)मा बोगटीले ‘पोइन्ट टुटु’ हतियार बोकेर हिँडेको भिडियो पोस्ट गरेकोमा उनलाई पक्राउ गरिएको बाँकेका एसपी सन्तोष सिंह राठौरले बताए।

बोगटी नेपालगन्जकै स्थानीय हुन्। नेकपा एमालेको युवा सङ्गठन राष्ट्रिय युवा सङ्घको महाधिवेशनमा भाग लिन गएका चक्रे मिलनसँग बन्दुक बोकेर हिँडेको भिडियो बोगटीले पोस्ट गरेका थिए।

प्रारम्भिक अनुसन्धानबाट सो हतियारको लाइसेन्स भएको र लाइसेन्स भए पनि प्रदर्शन गर्न नपाइने हुनाले सरकारी वकिल कार्यालयसँग राय लिएर मुद्दा अघि बढाइने प्रहरीको भनाइ छ।