नेपालमा १० हजार विदेशी श्रमिक कार्यरत, चिनियाँ मात्रै सात हजार बढी

काठमाडौं– नेपालका ठूला परियोजनामा देखिएको दक्ष श्रमिक अभाव विदेशबाट परिपूर्ति हुँदै आएको छ। नेपालमा सञ्चालित विभिन्न परियोजनामा आवश्यक दक्ष श्रमिकको आपूर्ति विदेशबाट हुँदै आएको सरकारी तथ्यांकले देखाएको छ। 

विदेशी श्रमिकलाई नेपालमा काम गर्ने इजाजत दिँदै आएको श्रम तथा व्यवसायजन्य विभागका अनुसार अहिले त्यस्ता परियोजनामा करिब १०० बढी मुलुकका श्रमिक कार्यरत छन्।

नेपालमा सबैभन्दा बढी चिनियाँ श्रमिक छन्। बेलायत, अमेरिका, दक्षिण कोरिया, भारत, जापानलगायत मुलुकका श्रमिकको संख्या पनि उल्लेख्य छ। सन् २०१७ यता सबैभन्दा बढी सात हजार ५  सय चिनियाँ नागरिकले श्रम इजाजत लिएर नेपालमा काम गरेका छन्। २ हजार ४९५ पुराना (नवीकरण) र ५ हजार २४ नयाँ चिनियाँ श्रमिकले श्रम इजाजत लिएका छन्। 

बेलायतका ४८८, अमेरिकाका ३३२, दक्षिण कोरियाका २४०, भारतका २३०, जापानका १९०, अस्टे«लियाका ११६, श्रीलंकाका ११३, जर्मनीका ९८, इटालीका ८२, फ्रान्स र फिलिपिन्सका ७९/७९ तथा बंगलादेशका ५६ श्रमिक कार्यरत रहेको विभागको तथ्यांकमा उल्लेख छ। 

विभागका महानिर्देशक कृष्णप्रसाद ज्ञवालीले विदेशी दक्ष श्रमिकले नेपालमा अनुमति लिएर काम गर्दै आएको बताए। नेपालमा सञ्चालित चिनियाँ परियोजनाको संख्या बढी भएकाले यहाँ काम गर्ने चिनियाँ श्रमिकको संख्या अन्य मुलुकको तुलनामा बढी देखिएको उनको भनाइ छ।

‘नेपालमा धेरै चिनियाँ प्रोजेक्ट सञ्चालित छन्। द्रुतमार्ग, सडक, जलविद्युत्, भूकम्पपछिको पुनःनिर्माणका परियोजना तथा विभिन्न ठेक्कामा चिनियाँ श्रमिकको संलग्नता छ’, उनले भने। 

प्रोजेक्ट इन्जिनियर, सुरुङ तथा हाइड्रो इन्जिनियर, विभिन्न गैरसरकारी संस्था, पाइटल, मेन्टिेनेन्स इन्जिनियर, मेकानिलकलगायत प्राविधिक पदमा विदेशी श्रमिक संलग्न हुने गरेको विभागले जनाएको छ।

रोजगारदाताले कुनै विदेशी नागरिकलाई काममा लगाउँदा विदेशी नागरिक राख्नका लागि विभागबाट श्रम इजाजत लिनुपर्ने व्यवस्था छ। विभागले विदेशी नागरिकको श्रम इजाजत व्यवस्थापनसम्बन्धी निर्देशिका, २०७५ अनुसार विदेशी श्रमिकलाई श्रम इजाजत दिँदै आएको छ। 

गृहको कार्यसहमतिका आधारमा श्रम स्वीकृति

नेपालमा काम गर्न आउने विदेशी श्रमिकलाई सम्बन्धित मन्त्रालयको सिफारिश र गृह मन्त्रालयको कार्यसहमतिका आधारमा मात्रै श्रम स्वीकृति दिइँदै आइएको विभागका महानिर्देशक ज्ञवालीले बताए। 

‘नेपालमा श्रम गर्नका लागि कामसँग सम्बन्धित मन्त्रालको सिफारिस र गृह मन्त्रालयको कार्यसहमति लिनुपर्ने व्यवस्था छ’, उनले भने, ‘सोही आधारमा विभागले उपलब्ध गराएको श्रम इजाजतपछि मात्र अध्यागमन विभागले श्रमिकलाई प्रवेशाज्ञा दिने गर्छ।’

विभागले विदेशी श्रमिकलाई एक वर्षका लागि श्रम इजाजत दिने गरेको छ। प्रत्येक वर्ष श्रम इजाजत नवीकरण गर्नुपर्छ। विशिष्ट दक्ष प्राविधिक श्रमिकको हकमा पटक–पटक गरी बढीमा ५ वर्ष र अन्य विदेशी श्रमिकको हकमा पटक–पटक गरी बढीमा ३ वर्षका लागि श्रम इजाजत दिनेछ।

६ महिने अवधिका लागि प्रतिव्यक्ति १५ हजार र ६ महिनाभन्दा बढी अवधिका लागि प्रतिव्यक्ति २० हजार दस्तुर तिर्नुपर्ने निर्देशिकामा उल्लेख छ।