उपनिर्वाचन लड्न बारा, तनहुँ र चितवनमा दर्ता भए २६ दल

काठमाडौं– निर्वाचन आयोगले आगामी १० वैशाखमा हुने प्रतिनिधिसभा उपनिर्वाचनका लागि तनहुँ १ र बारा २ मा २६ दल दर्ता भएको विवरण सार्वजनिक गरेको छ।

शुक्रबार आयोगले उपनिर्वाचनका लागि तनहुँ १ र बारा २ मा २६  राजनीतिक दल दर्ता भएको बताएको हो। यसअघि आयोगले चितवन २ मा  उपचुनावका लागि दर्ता हुने दलको संख्या २६ रहेको विवरण सार्वजनिक भइसकेको छ।

उपनिर्वाचनका लागि तोकिएबमोजिमको ढाँचामा मतदाता नामावली उपलब्ध गराउने व्यवस्था मिलाउन आयोगले प्रदेश र जिल्ला निर्वाचन कार्यालयलाई निर्देशन दिने निर्णय गरेको छ।

‘निर्णयबमोजिम चितवन जिल्ला प्रतिनिधिसभा सदस्य निर्वाचन क्षेत्र २, तनहुँ जिल्ला प्रतिनिधिसभा सदस्य निर्वाचन क्षेत्र १ तथा बारा जिल्ला प्रतिनिधिसभा सदस्य निर्वाचन क्षेत्र २ को उपनिर्वाचनमा उम्मेदवार हुन चाहने वा उम्मेदवारको निर्वाचन प्रतिनिधि हुन चाहने व्यक्तिले मतदाता नामावलीको उतार लिन कुनै निर्वाचन कार्यालयमा पनि निवेदन दिन सक्ने र यसरी निवेदन प्राप्त भए सम्बन्धित निर्वाचन कार्यालयबाट तोकिएको प्रक्रिया पूरा गरी प्रतिनिधिसभा तथा प्रदेशसभा सदस्य निर्वाचन निर्देशिका, २०७९ को अनुसूची–२ बमोजिमको ढाँचामा नामावलीको उतार उपलब्ध गराइनेछ,’ आयोगको विज्ञप्तिमा भनिएको छ।