तराईमा बढ्यो गर्मी, जनकपुरको अधिक तापक्रम ३२ डिग्री सेल्सियस पुग्यो

काठमाडौं- देशभर नै गर्मी बढ्न थालेको छ। तर, तराईका केही जिल्लामा भने औसतभन्दा बढी गर्मी बढेको छ।

प्रिमनसुन सुरु भएसँगै तापक्रम बढ्न थालेको मौसम पूर्वानुमान महाशाखाले जनाएको छ।

जनकपुरको अधिकतम तापक्रम ३२ डिग्री सेल्सियस पुगेको महाशाखाको भनाइ छ। धरानमा ३१ दशमलव ८, भैरहवामा ३१ दशमलव ९, सिमरामा ३१ दशमलव ४, विराटनगरमा ३१ दशमलव २, नेपालगञ्जमा ३० दशमलव ७ डिग्री सेल्सियस तापक्रम पुगिसकेको छ।

हिउँदयाममा वर्षा र हिमपात खासै नभएकाले गर्मी थप बढ्ने अनुमान गरिएको छ।

आज सुदूरपश्चिम, कर्णाली, लुम्बिनी र गण्डकी प्रदेशका पहाडी क्षेत्रको मौसम आंशिकदेखि सामान्य बदली हुने अनुमान छ। एक/दुई ठाउँमा फाट्टफुट्ट पानी पर्ने अनुमान छ।