डीआईजी सिंहले दिए राजीनामा

काठमाडौं– नयाँ प्रहरी प्रमुख (आईजीपी)को लाइनमा रहेको ठानिएका प्रहरी नायब महानिरीक्षक (डीआईजी) अशोक सिंहले राजीनामा दिएका छन्। आगामी चैतमा हालका आईजीपी धीरजप्रताप सिंह सेवानिवृत्त हुँदै छन्।

हाल सुदूपश्चिम प्रदेश प्रहरी कार्यालय प्रमुख रहेका डीआईजी सिंहले प्रहरी मुख्यालय पुगेर राजीनामा दिएका हुन्। प्रहरी अतिरिक्त महानिरीक्षक (एआईजी) बढुवाको दौडमा रहेका बेला जन्ममिति विवाद सार्वजनिक भएपछि सिंहले राजीनामा दिएको बताइन्छ।

सिंहको नागरिकता र प्रहरी सिटरोलमा रहेको उमर फरक–फरक भेटिएपछि प्रहरी प्रधान कार्यालयले आन्तरिक छानबिन थालेको थियो ।

सिंहले पेस गरेको २२ जेठ २०४२ मा जारी नागरिकता प्रमाणपत्रको प्रतिलिपिमा उनको उमेर १८ वर्ष जनिएको छ। जिल्ला प्रशासन कार्यालय कैलालीबाट जारी नागरिकताअनुसार उनको जन्ममिति २०२४ हुनुपर्ने हो। प्रहरी प्रधान कार्यालयको विवरणमा नागरिकताअनुसार सिंहको जन्ममिति २२ जेठ २०२४ हुने उल्लेख छ।