खुँडेपोखरीमा डुबेर एक बालकको ज्यान गयो

पोखरा- पोखरा महानगरपालिका-५ पर्स्याङस्थित खुँडेपोखरीमा डुबेर एक बालकको ज्यान गएको छ। 

पर्वत घर भई हाल पोखरा-५ धारापानीमार्गमा बस्दै आएका सुनिता केसीका चार वर्षीय छोरा सुहान केसी सोमबार साँझ ६ बजेदेखि हराइरहेकामा खोजी गर्ने क्रममा खटिएको प्रहरी टोलीले मंगलबार पोखरीमा शव फेला पारेको जिल्ला प्रहरी कार्यालयका प्रहरी निरीक्षक ज्ञानबहादुर खड्काले जानकारी दिए।

सशस्त्र प्रहरी र नेपाल प्रहरीको ‘रेस्क्यु’ टोलीले बालक पोखरीमा डुबेको आशंकामा खोजी गरेको थियो। घरबाट खेल्न निस्केका केसी अबेरसम्म घर नफर्केपछि परिवारले प्रहरीलाई खबर गरेपछि हिजोदेखि नै खोजी सुरु गरिएको खड्काले बताए।

बालकको शवपरीक्षणका लागि पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पतालमा राखिएको र आफन्तलाई जिम्मा लगाउने तयारी भइरहेको प्रहरीले जनाएको छ। बालक खेल्ने क्रममा पोखरीमा खसेको हुन सक्ने प्रहरीको अनुमान छ।