प्रधानन्यायाधीश नियुक्ति माग्दै बालुवाटार पुगे वकिल

काठमाडौं– कानुन व्यवसायीको छाता संगठन नेपाल बार एसोसिएसनले सर्वोच्च अदालमा प्रधानन्यायाधीश नियुक्ति प्रक्रिया चाँडो टुंग्याउन माग गरेको छ। मंगलबार बार अध्यक्ष गोपालकृष्ण घिमिरे नेतृत्वको टोलीले बालुवाटारमा प्रधानमन्त्री पुष्पकमल दाहाल प्रचण्डलाई भेटेर अविलम्ब प्रधानन्यायाधीश नियुक्तिका लागि सिफारिस गर्न माग गरेको हो।  

सर्वोच्चमा प्रधानन्यायाधीश र अन्य न्यायाधीश खाली हुँदा न्याय सम्पादनमा असर परेकाले यसलाई चाँडो टुंग्याउन प्रधानमन्त्रीको ध्यानाकर्षण गराइएको अध्यक्ष घिमिरेले बताए। 

अध्यक्ष घिमिरेले लामो समयदेखि कामुको भरमा सर्वोच्च अदालत चलिरहेकाले तत्काल प्रधानन्यायाधीश नियुक्तिका लागि सिफारिस गर्न प्रधानमन्त्रीसमक्ष माग गरिएको जानकारी दिए। प्रधानमन्त्री संवैधानिक परिषद्को अध्यक्ष रहने संवैधानिक व्यवस्था छ। १ फागुन २०७८ देखि हालसम्म सर्वोच्चमा कामु प्रधानन्यायाधीशबाट न्याय सम्पादन हुँदै आएको छ।