चन्द्र भण्डारीको स्वास्थ्यमा सुधार, भेन्टिलेटर हटाइयो

काठमाडौं- जलनमा परेर घाइते भएका नेपाली कांग्रेसका केन्द्रीय सदस्य तथा सांसद चन्द्र भण्डारीको स्वास्थ्य अवस्थामा सुधार आएको छ।

मुम्बईस्थित नेशनल बर्न सेन्टरमा भण्डारीसँगै रहेका कांग्रेस नेता योगराज कँडेलका अनुसार आज बिहानदेखि भण्डारीलाई भेन्टिलेटरबाट बाहिर राखिएको छ। बिहान ११ बजे डा. मुकेश मिश्रा र डा. अमोल मात्रेले दिएको जानकारी अनुसार अब भेन्टिलेटरबाट हटाएर अक्सिजनको सहयोगमा उपचार सुरु भएको छ। 

'खुसीको कुरा उहाँको ईटी ट्यूव निकालिएको छ। अहिले रिजरभायर व्याग मास्कबाट १५ लिटर अक्सिजन दिइएको छ। अहिले पनि ट्रयालमै राखिएको हो। डाक्टरहरुको योजनाअनुसार अक्सिजनको मात्रा १५ लिटरलाई घटाउँदै लगिनेछ,' कँडेलले भनेका छन्।

उनले डाक्टरहरुलाई उद्धृत गर्दै स्वास्थ्यका सबै पारामिटर सामान्य रहेको पनि बताएका छन्। 'फोक्सोको तल्लो भागमा थोरै इन्फेकसन देखिएको तर डराउनु पर्ने अवस्था नरहेको डाक्टरवाट जानकारी प्राप्त भएको छ। कल्चर रिपोर्ट आजै साँझसम्म आउने र सो बमोजिम इन्फेक्सनको पूर्ण जानकारी पश्चात एण्टीवायोटिकको मात्राको थपघट हुने जानकारी दिनुभयो,' कँडेलले जानकारी दिएका छन्।

कँडेलका अनुसार भण्डारीको सुन्निएको अनुहार पुरानो अवस्थामा फर्किएको छ। बोली नबुझिए पनि इशारा गर्ने र सामान्य अवस्थामा झै बोल्न खोजेको देखिएको उनले बताएका छन्।