महाशिवरात्रिमा पशुपतिनाथ आएका साधुसन्तलाई दक्षिणासहितको बिदाबारी

काठमाडौं– पशुपति क्षेत्र विकास कोषले महाशिवरात्रि अवसरमा पशुपतिनाथको दर्शनमा आएका साधुसन्तलाई दक्षिणसहित बिदाइ गरेको छ। सोमबार कोषले साधुसन्तलाई ९ हजार २०० रुपैयाँसम्म दक्षिणा दिएर बिदाबारी गरेको हो। 

कोषका कार्यकारी निर्देशक घनश्याम खतिवडाले सामान्य माग्दै हिँड्नेलाई २०० देखि सुरु गरेर नागा बाबासम्मलाई छुट्टाछुट्टै रुपमा बढीमा ९ हजार २०० रुपैयाँसम्म दक्षिणा दिएर बिदाइ गरिएको बताए। 

साधुसन्तले शिवरात्रिका बेला भक्तजनबाट दक्षिणा पाए पनि कोषको तर्फबाट दक्षिणास्वरुप दिने प्रचलनअनुसार उपलब्ध गराइएको उनको भनाइ छ। कोषले सबै साधुसन्तलाई एक–एक वटा रुद्राक्षको माला पनि दान दिएको छ। ६ फागुनमा परेको महाशिवरात्रिमा नेपाल र भारतबाट ठूलो संख्याका साधुसन्त पशुपतिनाथ दर्शनमा आएका थिए।