अबको राजनीतिक लडाइँ राष्ट्रपति : चित्रबहादुर केसी

काठमाडौं– राष्ट्रिय जनमोर्चाका अध्यक्ष चित्रबहादुर केसीले सभामुखको निर्वाचनपछि राष्ट्रपतिका लागि राजनीतिक लडाइँ सुरु भइसकेको बताएका छन्। शनिबार प्रतिनिधिसभाको बैठकमा बोल्दै अध्यक्ष केसीले सत्ताधारी र विपक्षी दलहरूबीच राष्ट्रपतिका लागि लडाइँ सुरु भइसकेको बताएका हुन्।

यसका लागि दलहरूलाई कम्फर्टेबल सभामुखको भूमिका चाहिने भएकाले पदको मान राख्न गाह्रो हुने केसीको भनाइ छ। उनले पद र शक्तिका लागि राजनीतिक दल लडाइँमा होमिएको आरोप लगाए। 

राजनीतिक दलले अहिले पनि महिलालाई दोस्रो दर्जाको रुपमा राखेको आरोप लगाउँदै उनले महिलालाई सभामुख नबनाएर उपसभामुखमा सीमित गर्न खोजेको बताए। राजनीतिलाई बिटुल्याउन सत्तापक्षले प्रयास गरिरहेको उनले दाबी गरे। जनमोर्चाले कांग्रेस उपसभामुख उम्मेदवार मुक्ताकुमारी यादवका पक्षमा भोट हाल्ने केसीले जानकारी दिए।