उपसभामुख चयन गर्न संसद् बैठक सुरु

काठमाडौं– संघीय संसद्को उपसभामुख चयनका लागि बोलाइएको प्रतिनिधिसभा बैठक सुरु भएको छ। शनिबार उपसभामुखका लागि निर्वाचन हुने कार्यतालिका संसद् सचिवालयले सार्वजनिक गरिसकेको छ। उपसभामुखमा राष्ट्रिय स्वतन्त्र पार्टीबाट इन्दिरा राना र नेपाली कांग्रेसबाट मुक्ताकुमारी यादव उम्मेदवार रहेका छन्।

रानाको प्रस्तावकमा रास्वपाका सोविता गौतम एवं समर्थकमा एमालेका कृष्णगोपाल श्रेष्ठ, नेकपा माओवादी केन्द्रका नारायणी शर्मा र राप्रपाका राजेन्द्र लिङदेन रहेका छन्। यादवको प्रस्तावकमा कांग्रेसका बद्रीप्रसाद पाण्डे एवं समर्थकमा नेकपा एसका मेटमणि चौधरी र लोसपाका सर्वेन्द्रनाथ शुक्ला रहेका छन्। 

बैठकमा दुवै उम्मेदवारका प्रस्तावक र समर्थकले आ–आफ्ना  पक्षका उम्मेदवारलाई समर्थन गर्न आग्रह गर्नेछन्। दलीय रुपमा संसद्मा प्रतिनिधित्व रहेका दलका नेताले पनि मन्तव्य राख्नेछन्।